චිලියේ පැටගෝනියානු කලාපයේ දී මතු වූ ‘දත් පහේ මෘගයා’ අතීතයේ ඒ කලාපයේ බිම්වල ඩයිනසෝරයන් ජීවත්ව සිටි යුගයේ ජීවත් වූයේ යැයි සලකෙන මේ මෘගයාගේ පොසිල බවට පත් වූ හකු ඇටයක්, එකට බැඳුණු දත් පහක් හමුවී තියෙනවා. ඌ ශාක භක්ෂකයකු ලෙසයි විද්‍යාඥයන් විසින් හඳුනාගෙන ඇත්තේ. මේ සොයා ගැනීම නිසා දකුණු ඇමෙරිකාවේ ක්ෂීරපායීන් විසූ යුගය මෙතෙක් සිතා සිටියාට වඩා අතීතයට යැවෙනවා.
පසුගිය වසරේදීද මේ ගල්වළෙන් කාන්තකයකුගේ පොසිලයක් සොයා ගත්තා. මැගලනෝඩන් බයිකාෂ්කෙන්කී (Magallanodon baikashkenke) කියා නම් ඒ ක්ෂීරපායීයාත් ඒ යුගයට අයත් එකෙක්. ඒ හැරුණාම මීට කලින් සොයා ගෙන ඇති පොසිල සියල්ලම ඊට පසුකාලීනව ජීවත් වූ, ඒ කියන්නේ වසර මිලියන 46ත් 38ත් අතර කාලයේ විසූ සතුන්. ඒ සත්ව පොසිල හමුවී තියෙන්නේ අ‍ැමරිකාවේ දකුණු තුඩුව ආශ්‍රිතවයි.
චිලි විශ්ව විද්‍යාලයේ පොසිල විද්‍යාඥ ආචාර්ය සර්ජියෝ සර්ටෝ කියන්නේ මෙවැනි සොයා ගැනීම්වලින් බොහෝ කලෙකට පෙර වඳවී ගිය ගොන්ඩ්වානන්තෙරියා (Gondwanatheria) නම් ආදී ක්ෂීරපායීන්ගේ පරිණාමය පිළිබඳ ගැටලු විසඳා ගැනීමට අපට හැකි වෙනවා කියලයි.
‘අපි මෙතෙක් බලාපොරොත්තු නොවූ දේ අපට හමුවෙමින් තියෙනවා. අපට ඩනොසෝරයන්, මැමේලියාවන් ඇතුළු ආදියේ විසූ අනෙක් සත්ව කාණ්ඩ ගැන මෙතෙක් නොදත් කරුණු රැසක් අනාවරණය කර ගැනීමට හැකි වේවි.’ආචාර්ය සෝලෝ කියනවා.
‘මේ වගේ තවත් තැන්වල පොසිල හමුවෙන්න පටන් ගත්තා ම අතීතයේ බොහෝ රහස් එළිදරවු වේවි. සත්ව පරිණාමයේ නව මානයකට අපව ගෙන යාවි.’ ඔහු වැඩිදුරටත් කියනවා.
- පර්සි ජයමාන්න
0 Comments